Sommaren er høgsesong for populære festivalar og kulturarrangement. Til fleire av festivalane og konsertane er billettane allereie utselt, men på svartebørsen dukkar det ofte opp billettar til sal.
Først og fremst er det greitt å vite at det er forbode å selje vidare billettar til ein høgare pris enn pålydande for arrangement i Noreg. Kvart år ser vi likevel at enkelte aktørar overprisar svartebørsbillettar til festivalar og andre kulturarrangement. Desse bør du styre unna. Har du allereie betalt ein høgare pris, kan du har krav på pengar tilbake.
Tips for å unngå billett-trøbbel:
Sjekk nettsida du handlar frå
- Sjekk om nettsida du bestiller frå er ein offisiell leverandør eller seljar på annenhåndsmarkedet (svartebørs). ikkje klikk automatisk på den øvste lenka som kjem opp når du søker etter billettar på nettet. Dette vil ofte vere ei lenke til ein svartebørsseljar.
- Finn derfor nettsida til arrangøren av konserten eller festivalen. Her finn du pris og kan bestille billettar på den måten arrangøren opplyser om. Billettsalet til veldig mange av konsertane og festivalane som blir arrangerte i Noreg skjer gjennom Ticketmaster eller Livenation.
- Kjøp berre billettar frå personar som annonserer på Finn.no eller i Facebook-grupper viss du er 100 % sikker på at du kan stole på vedkommande.
Ikkje betal på forskot og nytt sikre betalingsløysingar
- Betaler du kontant eller ved å overføre pengar til seljar sin bankkonto, står du svakare dersom du ikkje tek imot billetten eller ved svindel.
- Nettstadar der private seljarar formidlar billettar tilbyr gjerne ulike betalingsløysingar. Når du kjøper billettar, kan det lønne seg å nytte seg av slike løysingar. Skulle det seinare oppstå ein tvist i forbindelse med billettkjøpet, kan du klage til leverandøren av betalingsløysinga, som vil halde betalinga tilbake inntil tvisten er løyst.
- Hugs at du kan krevje pengar tilbake frå banken som har skrive ut kortet du betalte med dersom billetten ikkje blir levert eller festivalen blir avlyst.
Har du betalt for mykje?
Forbrukartilsynet handhevar svartebørslova, og kan gripe inn mot verksemder som seljar billettar til ein høgare pris enn arrangøren har sett. Vi kan òg gripe inn dersom marknadsføringa er villeiande eller vilkåra urimelege.
Lova gir kjøper rett til å krevje det som er betalt for mykje (over pålydande pris) tilbake frå seljar.